我們的堅持 8 : 手球運動員Freddie 謝永輝

謝永輝 Freddie ，香港男子手球隊隊長，隊中司職控球，曾三度參加亞運會，並帶領香港隊於亞洲錦標賽戰勝西亞職業隊約旦，投入手球至今已達十五年之久，曾獨自一人前往法國體驗當地職業球會生活，回港後全情投入手球事業，創立屬於他個人的「Dream Builder」 ，延續他推廣手球給年青一代的夢想。

Freddie 自中二開始接觸手球，經運動員計劃入讀學士學位課程，現在以手球教練及經營手球訓練中心維生，對於 Freddie 來說手球不單只是興趣，更是職業及生命中不可或缺的一部份。 多年手球生涯中， Freddie 最難忘 2022 年的亞洲錦標賽，曾帶領香港隊首次擊敗西亞勁旅約旦隊，寫下香港手球歷史性的一頁，亦是他手球生涯的高峰 ：「個次係香港隊首次擊敗西亞嘅職業隊，之前香港從來都未試過，因為無論係技術上定係在身體質素上面，香港隊都遠遠比不上西亞職業隊，個次係勝利對香港隊嚟講係好大嘅突破。」

眼見香港隊與外國強隊實力上的差異，除了體質上，還有手球文化及運動的氛圍。 法國曾奪得多屆奧運手球冠軍，作為傳統手球強國，Freddie一直嚮往在法國生活及親身體驗當地手球文化。在大學畢業後， Freddie 便毅然獨自一人前往法國，加入當地的手球隊，與當地運動員一齊訓練、出賽。 「去到之後，發現人哋打手球嘅環境好好，細細個嘅小朋友就有機會接觸手球，由細開始訓練；我加盟個隊只係當地地區性嘅隊伍，佢哋唔可以叫做職業隊，因為每位隊員都有自己嘅身份、工作，每個人都係係工餘時間抽九十分鐘出嚟訓練，但係佢哋對手球嘅水平同熱情係我哋香港無得比。相比之下，好多時係香港我哋都會畀自己好多原因藉口，工作太忙、時間唔夠投入唔到。但係人哋都係咁，水準比我哋高出好多。所以要提升香港嘅手球水平，最重要嘅成個社會對呢項運動嘅關注度同氛圍，要由細細個開始培養。」

回港後，Freddie 投身手球港隊同時，成立了屬於他的手球空間 Dream Builder。Dream Builder 成立的目的並非培育精英手球運動員，而是提供一個讓小朋友從小開始便接觸手球的空間。相比起教成年人打手球，Freddie 坦言自己較享受教小朋友的過程：「我平時教個啲係幼稚園咁細嘅小朋友，佢哋其實未必知道手球係乜嘢，但係細細開始透過遊戲的方式，跑跑跳跳，拍下波、掉下波咁接觸呢項運動，從小真正享受同喜歡手球。我聽過有啲家長係幫小朋友選擇小學入學時，都有特別詢問間學校有無手球隊，我感到特別開心。」總結法國回來的經驗，Freddie 覺得只有從根本性令手球這項運動普及化，由小時候開始培養對手球的興趣，方有機會提升香港手球水平。

「DreamBuilder  有一句 slogan ，係嚟自馬丁路德金嘅名言：I have a dream. 而 Dream Builder 嘅成立就係為咗自己追夢。以前我嘅夢想係做一個職業運動員，但係宜家我嘅諗法改變咗；宜家我更希望可以傳承到我嘅技術，用自己嘅身份推廣手球，等更多嘅小朋友第日可以憑住呢項運動搭飛機出去見識多啲呢個世界，有更有多嘅人生閱歷，我諗呢個係我宜家嘅夢想。」